အင်းလေးဇုန်သို့ သုံးနှစ်ဆက်တိုက် ပြည်ပခရီးသွား အဝင်နည်းလာသဖြင့် ခရီးသွားများကို အမှီပြုသည့် လုပ်ငန်းများထိခိုက်လာ

ဇော်ရဲသွေး/ သဇင်လတ်

အင်းလေး လှေဆိပ်မှာ တွေ့ရတဲ့ နိုင်ငံခြား ခရီးသွားဧည့်သည် တချို့

ရှမ်းပြည်တောင်ပိုင်းရှိ အင်းလေးဇုန်သို့ သုံးနှစ်ဆက်တိုက် ပြည်ပခရီးသွားများ ဝင်ရောက်မှုနည်းလာသဖြင့် ခရီးသွားများအပေါ်အမှီပြုပြီး လုပ်ကိုင်နေသော လုပ်ငန်းများ ထိခိုက်လာကြောင်း လုပ်ငန်းရှင်များထံမှ သိရသည်။

၂၀၁၇ ခုနှစ်နှောင်းပိုင်းမှစ၍ ယခုနှစ်အထိ ပြည်ပခရီးသွားများ လာရောက်လည်ပတ်မှုသည် တစ်နှစ်ထက်တစ်နှစ် ထက်ဝက်နီးပါးလျော့ကျလာသဖြင့် ဟိုတယ်လုပ်ငန်း၊ စားသောက်ဆိုင်လုပ်ငန်း၊ ယက္ကန်းလုပ်ငန်း၊ စက်လှေလုပန်ငန်းနှင့် အခြားဝန်ဆောင်မှုလုပ်ငန်းများကို ထိခိုက်လာသည်။

၂၀၁၇ သြဂုတ်လအထိ နှင့် ၂၀၁၈ သြဂုတ်လအထိ နှိုင်းယှဉ်ချက်အရ ပြည်ပခရီးသွား ၀ရောက်မှုသည် ၄၁ ရာခိုင်နှုန်းခန့် လျော့နည်းခဲ့ကြောင်း အင်လေးဇုန်ဝင်ခွင့် ကောက်ခံသည့်ကော်မတီ၏စာရင်းများအရသိရသည်။

၂၀၁၉ခုနှစ်တွင်လည်း ၂၀၁၈ ခုနှစ်ထက် ပြည်ပခရီးသွားများ ထပ်မံ လျော့နည်းလာကြောင်း နိုင်ငံခြားဧည့်သည်များကို အမှီပြုနေသည့် လုပ်ငန်းများထံမှသိရသည်။

ညောင်ရွှေမြို့ ပေါ်ရှိ ဟိုတယ် များ

ဟိုတယ်အချို့ ပိတ်သိမ်းမှုများရှိလာ

ပြည်ပခရီးသွားဝင်ရောက်မှုနည်းလာသဖြင့် ဟိုတယ်အချို့ ပိတ်သိမ်းလာပြီး ပြန်လည်ရောင်းချလိုသော ဟိုတယ်များလည်း ရှိနေကြောင်း အင်းလေကန် ရေရှည်ဖွံ့ဖြိုးတိုးတက်ရေးအတွက် လုပ်ဆောင်နေသည့် Save the Inlay Lake မှတာဝန်ရှိသူ ဦးခင်မောင်လတ်က ပြောသည်။

“ဟိုတယ်လုပ်ငန်းဆိုရင် တချို့ဆိုရင် တခြားသူတွေကို ရောင်းလိုက်ရတာတို့ ၊အချို့ဆိုရင် ပိတ်သိမ်းလိုက်ရတာတာတို့ ရှိတယ်။ တချို့က ကိုယ်ပိုင်မြေနဲ့မဟုတ်ဘဲ ဒေသခံမြေနေရာတွေငှားရမ်းထားတယ်။ ကုန်ကျစားရိတ်ကြီးတယ်။ ဟိုတယ်ကြီးတွေဆိုရင် ၀န်းထမ်းတွေ လျှော့ချလိုက်ရတဲ့အနေအထားတွေရှိတယ်။ ဟိုတယ်လေးတွေဆို ပိတ်ထားရတယ်”ဟုဦးခင်မောင်လတ်ကပြောသည်။

အင်လေးကန်နှင့် ညောင်ရွှေမြို့ပေါ်အတွင်းပိတ်ထားသည့် ဟိုတယ် သုံးခုခန့်ရှိကြောင်းတွေ့ရသည်။

အင်လေးဇုန်အတွင်း တရားဝင်ဖွင့်ခွင့်ရထားသော ဟိုတယ် ၁၁၃ လုံးရှိကြောင်း ရှမ်းပြည်နယ် ဟိုတယ်နှင့် ခရီးသွားလာရေး သတင်းအချက်အလက်ဌာနခွဲမှ သိရသည်။

ရခိုင်ပြည်နယ်တွင် ပဋိပက္ခဖြစ်ပွားပြီးနောက် အမေရိကန်အပါအဝင် အနောက်ဥရောပမှ ခရီးသည်များသည် ရိုင်ရယ်အင်းလေး ဟိုတယ်သို့ ကြိုတင်အခန်းမှာယူထားခြင်းများကို ပြန်လည်ပယ်ဖျက်ခဲ့သည်များရှိကြောင်း ရိုင်ရယ်အင်းလေးဟိုတယ်မှသိရသည်။

ယခုလို ခရီးသည်များ အဝင်နည်းသည့်ကာလတွင် အလုပ်ပါးသည့်အတွက် အချို့သောဟိုတယ်များမှ ဝန်ထမ်းများကို လစာမဲ့ခွင့်ပေးပြီး အနားပေးထားလေ့ရှိပြီး အင်းလေးဒေသရဲ့ ပွဲတော်ကာလ(လူစည်ကားချိန်)မှ ပြန်လည်ခေါ်ယူလေ့ရှိကြောင်း အင်းလေးဇုံအတွင်းရှိ ဟိုတယ်အချို့ထံမှ သိရသည်။

ယက္ကန်းလုပ်ငန်းအချို့ ဝင်ငွေထိခိုက်၊  ပြည်တွင်းဦးစားပေးထုတ်လာ

ကြာချည်နှင့် ယက်လုပ်ထားသည့် အထည်များရောင်းချသည့် ခေတ်ဆန်းယဉ် ယက္ကန်းရုံသည် ပြည်ပခရီးသွားဝင်ရောက်မှုများသော နှစ်များတွင် အထည်ရောင်းအား တစ်ရက်လျင် ကန်ဒေါ်လာ တစ်ထောင်ကျော်ရောင်းချရပြီး ယခုနှစ်တွင် တစ်ရက် ကန်ဒေါ်လာ သုံးရာဝန်းကျင်သာရကြောင်း ဆိုင်တာဝန်ခံထံမှသိရသည်။

အင်းလေးကန်ထဲတွင် ယက္ကန်းရုံဖွင့်ထားပြီး ဒေသထွက် ဝတ်စုံများ ယက်လုပ်ရောင်းချနေသော ရွှေပဒုမ္မာဆိုင်သည်လည်း ဆိုင်စဖွင့်စဉ်က ပြည်ပခရီးသွားများကို ရောင်းရန် သီးသန့်ရည်ရွယ်ပြီး ဖွင့်ခဲ့ပေမယ့် ၂၀၁၈ ခုနှစ်မှစ၍ ပြည်တွင်းခရီးသွားများအတွက် ပြောင်းလဲရောင်းချလာရကြောင်း ဆိုပိုင်ရှင်မှသိရသည်။

ကြာချည်ထည်များဟာ  ပုဝါ သက္ကန်း စသည့်အမျိုးအစားပေါ် မူတည်ပြီး ကျပ်ကိုးသောင်းမှ နှစ်ဆယ့်သုံးသိန်းအထိ ဈေးနှုန်းရှိကြောင်းသိရသည်။

လက်ရှိ ကြာချည်အထည်ထက် ပြည်တွင်းကြိုက်ဈေးသက်သာသည့် ချည်ထည်၊ ပိုးထည်များကိုပိုမိုရောင်းချလာကြောင်း ယက္ကန်းရုံများမှသိရသည်။

အင်းလေးဒေသသည် မိုးရာသီတွင် ခရီးသွားဝင်ရောက်မှု လျော့နည်းလေ့ရှိသော်လည်း သြဂုတ်လမှစ၍ စပိန်နိုင်ငံ နှင့် အီတလီနိုင်ငံခရီးသည်များလာရောက်လည်ပတ်လေ့ရှိပြီး ခရီးသည်ဝင်ရောက်မှု ပြန်လည်မြင့်တက်လေ့ရှိကြောင်းသိရသည်။

၂၀၁၇ နောက်ပိုင်းမှ ယခုအချိန်ထိ  အီတလီနှင့် စပိန်နိုင်ငံမှ ခရီးသည်များ မလာသလောက် ဖြစ်သွားကြောင်း ယက္ကန်းရုံများထံမှသိရည်။

စက်လှေမောင်းသမားများရပ်တည်ရ ခက်ခဲလာ
အင်းလေးဒေသသို့ လာရောက်လည်ပတ်သူများကို စက်လှေများဖြင့် လိုက်ပါပို့ဆောင်ပေးရန် အတွက်စက်လှေလုပ်ငန်းလုပ်ကိုင်နေသူများနှင့် စက်လှေသမားများ လည်း ၀င်ငွေလျှော့လာကြောင်း ၎င်းတို့ထံမှသိရသည်။
၂၀၁၇ အရှေ့ပိုင်းက ဧည့်သည်များအဝင်များသဖြင့် ရှိသည့်စက်လှေနှင့်မလုံလောက်သည့် အခြေအနေမျိုးကြုံခဲ့ရပေမယ့် လက်ရှိအချိန်မှာတော့ တစ်နေ့လျှင် စက်လှေသုံးစီးခန့်သာ ပြေးဆွဲနေရေကြောင်း စက်လှေ ၂၈ စီး ပိုင်ဆိုင်သည့် ညောင်ရွှေစက်လှေများအသင်း ဥက္ကဌ ဦးစိုးမြင့်သောင်းက ပြောသည်။
 “မနှစ်က နည်းတယ်ဆိုတာ ဒီနှစ်လောက်မဆိုးဘူး။ ဒီနှစ်ကပိုဆိုးနေတယ် ။မနှစ် (ဒီအချိန်)ကပျမ်းမျှတွက်မယ်ဆိုရင် တစ်ရက်ကို ဆယ်စီးလောက်ကတော့ ထွက်နေရတယ် ဒီနှစ်က နှစ်စီးသုံးစီးနဲ့တင်ပြီးနေတယ်” ဟု ဦးစိုးမြင့်သောင်းကပြောသည်။
ယခင်က ခရီးသည်များကို နေ့စဉ် စက်လှေမောင်းပို့နေရသော်လည်း ယခုအခါ ၈ ရက်အတွင်းမှာ စက်လှေနှစ်ခေါက်သာ ပို့ရသဖြင့် တစ်ယောက်စာ ထမင်းစားရိတ်(၃၀၀၀) ပင်ရရှိရန် ခက်ခဲလာကြောင်း စက်လှေသမားတစ်ဦးကဆိုသည်။
လက်ရှိအခြေအနေမျိုးဆက်ဖြစ်နေရင် ခရမ်းချဉ်သီး စိုက်ပျိုးသည့်လုပ်ငန်းကို ပြောင်းလဲလုပ်ကိုင်တော့မည်ဖြစ်ကြောင်း ၎င်းကပြောသည်။
ခရီးသည်များ အ၀င်နည်းသည့်အပြင် သယ်ယူပို့ဆောင်ရန် မှတ်ပုံမတင်ထားသည့် စက်လှေအစီးရေလည်း များလာသည့်အတွက် ၎င်းတို့အနေဖြင့် ဝင်ငွေနည်းသွားကြောင်း ဦးစိုးမြင့်သောင်းကပြောသည်။
အင်းလေးဒေသတွင် တရားဝင်မှတ်ပုံတင်ထားသည့် စက်လှေအစီးရေ ၃၀၀၀ ကျော်ရှိပြီး မှတ်ပုံမတင်ထားသည့် စက်လှေမှာ မှတ်ပုံတင်ထားသည့် ဆယ်လှေ၏ ဆယ်ဆ၀န်းကျင်ခန့်ရှိကြောင်း စက်လှေလုပ်ငန်းရှင်များအသင်းမှသိရသည်။

စားသောက်ဆိုင်များ ဒေသအကြိုက်ပုံစံ ပြောင်းလဲလာ

အင်းလေးဇုန်အတွင်းသို့ သွားရောက်လေ့လာသည့်အခါ စားသောက်ဆိုင်အချို့သည် ပိတ်သိမ်းထားသည်ကို တွေ့မြင်ရသည်။
ဤကဲ့သို့ ပိတ်ထားသည်မှာ အချို့က ယခုလိုမိုးရာသီတွင် ခရီးသွားနည်းသည့်အတွက် နှစ်စဉ်ပိတ်ကြသလိုရှိပေမယ့် ဒေသခံဆိုင်အချို့ကတော့ လုံးဝပြန်မဖွင့်တော့သည်အထိ ပိတ်သိမ်းသွားကြကြောင်း ပိတ်ထားသည့်ဆိုင်ပတ်ဝန်းကျင်မှ စားသောက်ဆိုင်အချို့ထံမှသိရသည်။
ညောင်ရွှေမြို့ပေါ်ရှိ စားသောက်ဆိုင်အချို့မှာ ပုံစံပြောင်းပြီး ရောင်းချလာကြောင်း Peter Tapas & Grill စားသောက်ဆိုင်ပိုင်ရှင်ထံမှသိရသည်။
“အမတို့က နိုင်ငံခြားခရီးသွားတွေ နည်းလာတယ်ဆိုပြီး ဆိုင်ကို ပိတ်ပစ်လို့လည်းမရဘူးလေ။ ပြည်တွင်းကလာတဲ့သူတွေကို သူတို့အကြိုက်ပုံစံတွေ သင်္ဘောသီးထောင်းတို့လို ချဉ်ချဉ်စပ်စပ် အရသာ ပုံစံမျိုးတွေ ပြောင်းရောင်းတယ်။ အဲ့တော့ ဆိုင်ပိတ်တဲ့ အထိတော့ အခြေအနေ မဆိုးသေးဘူး”ဟု Peter Tapas & Grill ဆိုင်ပိုင်ရှင် မှပြောသည်။

အချို့ဆိုင်များမှာ ဆောက်လုပ်ပြီးစ အခြေအနေမှာတွေ့ရသော်လည်း တစ်နှစ်ကျော်ကြာသည်အထိ ဆုိုင်မဖွင့်သေးကြောင်း ၄င်းကပြောသည်။

အင်းလေးဒေသသို့ပြည်ပခရီးသွားများကို ဘယ်လုိုပြန်ဆွဲဆောင်မလဲ.. 

အင်းလေးဒေသကို ယခင်ကဲ့သို့ ခရီးသွားများ ပြန်လည်ဝင်ရောက်လာရန် အစိုးရအနေဖြင့် ပြည်တွင်းငြိမ်းချမ်းရေး ရရှိရေးနှင့် အင်းလေးကန်ကို ယခင်ကလို သန့်ရှင်းနေအောင် စောင့်ရှောက်ရန်လိုအပ်ပြီး တိမ်ကောပျက်စီးနေသော နေရာများကို ပြန်လည်ပြုပြင်သွားပါက ခရီးသွားများ ပြန်လည်ဝင်ရောက်လာမည်ဟု Save The Inle Lake အဖွဲ့၏ အထွေထွေအတွင်းရေးမှူးဖြစ်သူ ဦးခင်မောင်လတ်ကပြောသည်။

“နိုင်ငံခြားသား နည်းလာတဲ့ကိစ္စကတော့ အဓကကတော့ ရခိုင်အရေးကြောင့်ပေ့ါ။ ပြီးတော့ အစိုးရက အာရှခရီးသွားပိုမိုတိုးတက်လာဖို့လုပ်ပေမယ့် ခုဖြစ်နေတဲ့ ရှမ်းမြောက်က စစ်ပွဲတွေကြောင့်လည်း မလာနိုင်တော့ဘူးလေ။ အရင်ကရှိခဲ့တဲ့ ကမ္ဘာ့ပထမဆုံး ရေပေါ်ဈေးကို ပြန်လည်ဖော်ဆောင်ပေးနိုင်ရင်တော့ နိုင်ငံခြားခရီးသွားတွေကို ပြန်လည်ဆွဲဆောင်နိုင်မှာပါ။ အင်းလေးကန်ကြီးက ပတ်ဝန်းကျင် အရင်တုန်းကလို သာယာလှပလာရင်တော့ ခရီးသွားတွေ လာကြမယ်လို့ မျှော်လင့်ရတာပေါ့လေ”ဟု ဦးခင်မောင်လတ်ကပြောသည်။

ပြည်ပခရီးသွားများကို ဆွဲဆောင်ရန် အင်းလေးဒေသ၏ ကိုယ်ပိုင်အမှတ်တံဆိပ်ဖြင့် ဒေသထွက်ပစ္စည်းများထုတ်လုပ်ရန် ပြင်ဆင်နေကြောင်း သိရသည်။

ပြည်ပခရီးသွားများ ၀င်ရောက်မှု ပြန်လည်များလာစေရန်ရည်ရွယ်ပြီး ဟိုတယ်နှင့် ခရီးသွားလာရေး ဝန်ကြီးဌာနမှ အာရှနိုင်ငံများမှ ခရီးသွားများအတွက် ဗီဇာကင်းလွတ်ခွင့်နှင့် ဆိုက်ရောက်ဗီဇာ(ကမ္ဘာလှည့်)အား စမ်းသပ်ခွင့်ပြုထားမှုကို ၂၀၂၀ နိုဝင်ဘာလ ၃၀ ရက်အထိ တစ်နှစ်ထပ်တိုးထားသော်လည်း အင်းလေးဒေသသို့ ဧည့်သည်ဝင်ရောက်မှုများ လျော့နည်းနေဆဲဖြစ်သည်။

၂၀၁၇ ဇူလိုင်လတွင် အင်းလေးဒေသသို့ နိုင်ငံခြားဧည့်သည် ၀င်ရောက်မှုဦးရေမှာ တစ်သောင်းနီးပါးရှိခဲ့ပြီး ၂၀၁၈ ဇူလိုင်လနှင့် ၂၀၁၉ ဇူလိုင်လမှာတော့  ၅၀၀၀ ၀န်းကျင်စီသာ ၀င်ရောက်လာကြောင်း ဟိုတယ် နှင့် ခရီးသွားလာရေး ညွန်ကြားမှုဦးစီးဋ္ဌာန၊ ညောင်ရွှေဌာနခွဲမှ သိရသည်။

၂၀၁၇ မတိုင်ခင်တွင် မြန်မာ တစ်နိုင်ငံလုံး အတိုင်းအတာအရ ခရီးသွား ဝင်ရောက်မှုမှာ ၃သန်းကျော်အထိ တိုးတက်ခဲ့ပြီး၊၂၀၁၈ မှ စ၍ ခရီးသွားဝင်ရောက်မှုမှာ ထက်ဝက်ခန့်  လျှော့ကျလာခဲ့ကာ ယခုနှစ်တွင် အနည်းငယ် ပြန်လည်တိုးတက်လာနေပါသည်။

Leave a Reply

Close Menu