ကျားမင်းကြီးအရက်ဆီချက်စက်ရုံနှင့် ဒေသခံများကြားက ရေဆိုးစွန့်ပစ်သည့် ပြဿာနာ ပြေလည်လာ
မျုိုးဖေါက်ပြီးသား တင်လဲရည်ကို ပေါင်းခံချက်လုပ်သည့်နေရာ

ကျားမင်းကြီးအရက်ဆီချက်စက်ရုံနှင့် ဒေသခံများကြားက ရေဆိုးစွန့်ပစ်သည့် ပြဿာနာ ပြေလည်လာ

Author By : Han Toe San
Date : 22 August 2019

တောင်ကြီးမြို့နယ် တောင်လေးလုံးကျေးရွာ အုပ်စု ဖက်နာမ်ရွာရှိ ကျားမင်းကြီး အရက်ဆီချက် စက်ရုံ

Photo By : Han Toe San

တောင်ကြီးမြို့နယ်၊ တောင်လေးလုံးကျေးရွာအုပ်စု၊ ဖက်နမ်ရွာရှိ  ကျားမင်းကြီးအရက်ဆီချက်စက်ရုံနှင့် ဒေသခံရွာသားများကြား လေးနှစ်ကြာ ဖြစ်ပွားနေသည့် စွန့်ပစ်ရေဆိုးပြဿနာ  ပြေလည်မှုရရှိသွားပြီ ဖြစ်ကြောင်း စက်ရုံနှင့် ဒေသခံများထံမှ သိရသည်။

ယခင်နှစ်က ဒေသခံလယ်များ အတွင်းသို့ ဝင်ခဲ့သော စက်ရုံစွှန့်ပြစ်ရေစိုးများ

Photo By : U Moe Zaw

စက်ရုံမှ စွန့်ထုတ်သည့် စွန့်ပစ်ရေဆိုးများကို သန့်စင်သည့် စနစ်ကို စက်ရုံဘက်မှ လွန်ခဲ့သည့် ခြောက်လက စက်ရုံပိတ်ပြီး  တပ်ဆင်ခြင်းပြုလုပ်ခဲ့ကာ  စမ်းသပ်လည်ပတ်သည့်အခါ ရေဆိုးပြဿနာ မရှိတော့ကြောင်း စက်ရုံနှင့် ဒေသခံများက ပြောသည်။

            “အရင်တုန်းက ဒီ Evaporator(ရေဆိုးသန့်စင်သည့်စက်) ဆိုတဲ့စက်မရှိခင်ကတော့ စက်ရုံက စွန့်ပစ်(စွန့်ပစ်ရေ) ထွက်တယ်၊စွန့်ပစ်ထွက်တော့ကျွန်တော်တို့ ဧရိယာထဲ (စက်ရုံဧရိယာထဲ) ကို ပဲပစ်လိုက်တယ်။ မိုးရွာတော့သူကရေစီးနဲ့ အတူ ရွာသားတွေလယ်ထဲရောက်ကုန်ရော။ အခုတော့ကျွန်တော်တို့က ဒီ Evaporatorဆိုတဲ့ ရေဆိုးသန့်တဲ့စက်ကိုတပ်ဆင်လိုက်ပြီ ။အဲ့ဒီတော့ကျွန်တော်တို့မှာဒေသခံတွေနဲ့ အဆင်မပြေစရာမရှိတော့ဘူး” ဟု စက်ရုံမန်နေဂျာ ဦးအောင်ဇော်ဖြိုးကပြောသည်။

ကျားမင်းကြီး အရက်ချက်စက်ရုံကို လွန်ခဲ့သော ၁၅ နှစ်က စတင်တည်ထောင်ခဲ့ကာ  ပြီးခဲ့သည့်  လေးနှစ်မှစပြီးအရက်ဆီထုတ်လုပ်ရာမှစွန့်ပစ်သည့် ရေဆိုးများဟာ အနီးဝန်းကျင်ရှိ ဖက်နမ်၊တောင်ဦးတောင်ခြေ၊ ရေနွေးကျေးရွာရှိ ဒေသခံများ၏ လယ်ယာမြေများအတွင်း ၀င်ရောက်ခဲ့သည်။

လယ်ယာမြေ များအတွင်း စွန့်ပစ်ရေဆိုးများ ၀င်လာပြီး  စိုက်ပျိုးသီးနှံများ အသီးမအောင်ခြင်း၊ အပင်မသန်ခြင်း၊ အပင်မရှင်ခြင်းစသည့် ပြဿနာများကို လယ်သမားများက သုံးလေးနှစ်ခန့်ခံစားရသည်။

၂၀၁၈ ခုနှစ်က အဆိုးရွားဆုံးခံစားခဲ့ကြရပြီး  ရေဆိုးပြဿာနာကို ဖြေရှင်းပေးရန် ရွာသူရွာသာများက စုပေါင်းလက်မှတ်ထိုးကာ ပြည်နယ်လွှတ်တော်ကော်မတီသို့ တင်ပြခဲ့သည်။

ကော်မတီသို့ တင်ပြပြီးနော်က သက်ဆိုင်ရာက စက်ရုံသို့ လာရောက်စစ်ဆေးပြီး ရေဆိုးစွန့်ထုတ်သည့် ပြဿနာတွေကို ကြပ်မတ်ခဲ့ကာ စက်ရုံကြောင့် ပျက်စီးသွားသော မြေယာသီးနှံ ပမာဏအလိုက်ကိုလည်း စက်ရုံဘက်မှ ဒေသခံများကို လျော်ကြေးပေးစေခဲ့သည်။

ယခုအသုံးပြုသော ရေဆိုးသန့်စင်သည့် စနစ်မှာ ရေဆိုးကို ပြန်လည်သန့်စင်ပြီး ရရှိသောရေကိုစက်ရုံအတွက် ပြန်လည် အသုံးပြုနိုင်သည့် အတွက် ဒေသခံများဆီသို့ ရေဆိုးများမရောက်ရှိတော့ပေ။

            လက်ရှိ စက်ရုံ စမ်းသပ်လည်ပတ်စဉ်ကာလမှာ  လယ်ထဲသို့ ရေဆိုးမရောက်ရှိတော့ကြောင်း ရေဆိုး၏ ဒဏ်ကို အများဆုံးခံခဲ့ရသည့် စက်ရုံနှင့် အနီးဆုံး လယ်ပိုင်ရှင် ဦးအေးမောင်က ပြောသည်။

 

ဦးအေးမောင်သည် လယ် လေး ဧက ပိုင်ဆိုင်ပြီ ပြီးခဲ့သည့် နှစ်က စွန့်ပစ်ရေဆိုးကြောင့် လယ် သုံးဧကခန့် ပျက်စီးခဲ့ရသည်။

စက်ရုံမှ တပ်ဆင်ထားသည့်  Evaporator စက်ကို  အိန္ဒိယနိုင်ငံမှ မှာယူခဲ့ပြီး စက်အသုံးပြုပုံကို  အိန္ဒိယနိုင်ငံသားအင်ဂျင်နီယာတစ်ဦးမှ စက်ရုံရှိ အင်ဂျင်နီယာများကို သင်ပြပေးခဲ့ကြောင်း စက်ရုံမန်နေဂျာထံမှသိရသည်။

“စက်ရဲ့ကုန်ကျစရိတ်က နောက်ထပ်စက်ရုံတစ်ခုတည်လို့ရတယ်။အဲ့ဒါကြောင့်ကြာနေတာ။စက်တန်ဖိုးက ဒေါ်လာ ၆သိန်းခွဲလောက်ရှိတယ်” ဟု မန်နေဂျာ ဦးအောင်ဇော်ဖြိုးကပြောသည်။

 စက်ရုံမှ စွှန့်ပစ်ရေဆိုးကို သန့်စင်ပုံအဆင့်ဆင့်

Photos By : Kyar Min Gyi Factory

ကျားမင်းကြီး အရက်ဆီချက်စက်ရုံ နှင့် ယခင်စွန့်ပစ်ရေဆုိုးပြဿနာ

ကျားမင်းကြီး အရက်ဆီချက် စက်ရုံကို ၂၀၀၄ ခုနှစ်တွင် တောင်ကြီးမြို့နယ်၊ တောင်လေးလုံးကျေးရွာအုပ်စု၊ ဖက်နမ်ကျေးရွာ တွင်စတင်တည်ထောင်ခဲ့သည်။

စက်ရုံ ဧရိယာမှာ ဧက ၉၀ကျော် ကျယ်ဝန်းပြီး တစ်ရက်လျှင် အရက်ဆီ ၆၅၀၀ ဂါလံ အထိ ထုတ်လုပ်သည်။တင်လဲရည်ကို အသုံးပြုပြီး အရက်ဆီ တစ်မျိုးတည်း ကိုသာ ထုတ်လုပ်သည့် စက်ရုံဖြစ်သည်။

            စက်ရံမှ ထွက်လာသည့် အရက်ဆီကို မန္တလေးသို့အဓိက တင်ပို့သည်။

စက်ရုံစတင်လည်ပတ်စဉ်က ရေဆိုးများအတွက် စွန့်ပစ်တွင်း လေးတွင်းရှိခဲ့သည်။ နှစ်ကြာလာသည့်အခါစွန့်ပစ်တွင်းများ မဆံ့တော့သောကြောင့်စက်ရုံပိုင် မြေလွတ် ခြံဝင်းအတွင်းစွန့်ပစ်ခဲ့သည်။

စက်ရုံမှစွန့်ပစ်ရေဆိုးများကိုစက်ရုံပိုင်နက်အတွင်းစွန့်ပစ်သော်လည်းမိုးရွာသည့်အခါ ရေနှင့်အတူ စီးလာကာ ဒေသခံများ၏ တောင်ယာများဆီရောက်ရှိလာပြီး စိုက်ခင်းများပျက်စီးခဲ့ရသည်။

ယခုအခါစက်ရုံဘက်မှ ရေဆိုးမထွက်စေရန် လွန်ခဲ့သော၆လခန့်ကစက်ရုံကိုခေတ္တပိတ်ထားပြီး  Evaporato စက်ကို တပ်ဆင်ခဲ့သည်။

စက်တပ်ဆင်ပြီး စမ်းသပ်လည်ပတ်သည့် ကာလမှာ ရက် ၂၀ခန့် ကြာပြီး လွှတ်တော်ကိုယ်စားလှယ်နှင့် ကျေးရွာဥက္ကဌများသွားရောက် ကြည့်ရှုခဲ့သည်။

စမ်းသပ်မှု အောင်မြင်ခဲ့ပြီး  ပြန်လည်သန့်စင်သည့် ရေဆိုးကို သောက်သုံး၍ မရသော်လည်း စက်ရုံအတွက် ပြန်လည်အသုံးပြုနိုင်သည့် ရေကြည်နှင့် အရက်ချက်ရာတွင် ဖြည့်စွက်လောင်စာအဖြစ်အသုံးပြုနိုင်သည့် စွန့်ပစ်ရေအနည်းငယ်ကျန်ရှိနေသော အနယ်အနှစ်များကို ရရှိခဲ့သည်။

လယ်ယာမြေတွေပျက်စီးပြီး ကျန်းမာရေးထိခိုက်ခဲ့ရ

ဒေသခံများ၏ မြေယာများနှင့် နီးကပ်သော ကျားမင်းကြီး အရက်ဆီချက် စက်ရုံကို အပေါ်စီးမှ မြင်ရစဉ်

ယခင်က စက်ရုံ စွန့်ပစ်ရေဆိုးများသည် မြောင်းများ၊ချောင်းများ မှတစ်ဆင့် စက်ရုံအနီးနားရှိ ရေနွေးရွာ၊တောင်ဦးတောင်ခြေရွာ၊ဖက်နမ်ရွာ နှင့် အခြားရွာများရှိ   လက်ကွင်းများဆီရောက်ရှိလာသည်။

စက်ရုံနှင့် အနီးဆုံးရှိသည့် ဖက်နမ်ရှိမှာ လူဦးရေ ၁၄၀၀ ခန့်ရှိပြီး အများစုမှာ လယ်၊စပါး၊ ပြောင်း၊ ကြက်သွန်စိုက်ပျိုးခြင်းဖြင့် အသက်မွေးဝမ်းကြောင်းပြုကြသည်။

 ရေဆိုး၏ အနံ့သည် ဆိုးရွားပြီး ရေဆိုးဝင်ရောက်သည့် လယ်ယာမြေများရှိ စိုက်ခင်းများ ပျက်စီးခဲ့သည်။

 ပြီးခဲ့သည့်နှစ်က ရေဆိုး၏ဒဏ်ကို အဆိုးရွားဆုံး ခံစားခဲ့ကြရပြီး ကျေးရွာလူနေအိမ်ခြေများအထိ ရေးဆိုအနံ့များ ရောက်ရှိလာကာ ဒေသခံများ ကျန်းမာရေးပြဿနာအချို့ ခံစားခဲ့ရကြောင်း ရွာတာဝန်ရှိသူများကပြောသည်။

“ရေဆိုးများမှထွက်တဲ့ အနံ့တွေက ရွာသားတွေကို အရွယ်သုံးပါးမရွေး ချောင်းဆိုးတာတွေ၊ အသက်ရှူကြပ်တာတွေအဖြစ်များကြတယ်”ဟုဖက်နမ်ကျေးရွာဥက္ကဌ ဦးမိုးကပြောသည်။

ရေဆိုးများကြောင့်ဒေသခံများ၏ ပြောင်းနှင့်  စပါးစိုက်ခင်းများပျက်ဆီးခဲ့ပြီး စိုက်ခင်းအတွင်းဆင်းသော ရွာသူ၊သားများအနေနှင့်လည်း ယားယံခြင်း၊ အနာပေါက်ခြင်းများဖြစ်ခဲ့သည်။

ရေဆိုးပြဿနာ ထပ်မံမဖြစ်ပွားရန်

ယခင်ရေဆိုးစွန့်ပစ်ထားသည့် စက်ရုံပိုင် မြေများကို မြေဖို့ရန် ဆောင်ရွက်နေ

Photo By : Han Toe San

ဖက်နမ်ကျေးရွာအတွင်းနေထိုင်သူ ဒေါ်ငြိမ်းက လက်ရှိမှာ စက်ရုံက ရေဆိုးစွန့်ထုတ်မှု မရှိသေးသော်လည်း ရေရှည်မှာ ထပ်မံဖြစ်ပွားလာမည်ကို စိုးရိမ်နေသည်။

 “စက်ရုံဆီက အရင်လို အနံ့ စူးစူးဝါးဝါး မထွက်တော့ပေမယ့် မိုးရွာတာနဲ့ အနံ့ ကထွက်လာတာပဲ” ဟုပြောသည်။

 ယခင်ကရေဆိုးစွန့်ပစ်ခဲ့သော နေရာများကို စက်ရုံဘက်မှ မြေဖို့လျက်ရှိပြီး မိုးများသောအချိန်ဖြစ်သောကြောင့် မြေဖို့ သည့်စက်မှာ ကွင်းပြင်သို့ မရောက်ရှိနိုင်သေးသောကြောင့် အနံ့ အနည်းငယ် ထွက်နေသေးကြောင်း မန်နေဂျာ ဦးအောင်ဇော်ဖြိုးကပြောသည်။

မိုးနည်းလာပြီး မြေမာလာသည့်အခါ အနံ့ပျောက်စေရန် မြေများ ဆက်လက်ဖို့သွားမည်ဖြစ်ကြောင်းလည်း၎င်းကဆက်ပြောသည်။

လက်ရှိမှာ စက်ရံကို အဆင့်မြှင့်တင်နေသောကြောင့်  ခေတ္တ ရပ်နားထားသည်။ ပြန်လည်လည်ပတ်ရန်အတွက်အစိုးရခွင့်ပြုမိန့် ကိုစက်ရုံအဆင့်မြှင့်တင်မှု အားလုံးပြီးသွားသည့်အခါ တောင်းခံသွားမည်ဟု စက်ရုံထံမှ သိရသည်။

  စက်ရုံကို ကျေးရွာဥက္ကဌများမှ အပတ်စဉ် တနင်္လာနေ့တိုင်းလာရောက်စစ်ဆေးခြင်းများပြုလုပ်နေပြီး စက်လုံလည်ပြီးနောက်ပိုင်းလည်း ပုံမှန် စစ်ဆေးသွားမည်ဖြစ်ကြောင်း စက်ရုံ နှင့် ဒေသခံများထံမှသိရသည်။

ရှမ်းပြည်နယ်တွင် အရက်ဆီချက်စက်ရုံ ၈ ရုံခန့်ရှိပြီး အရက်ချက်လုပ်ငန်းလိုင်စင်များ ကို တစ်နှစ်လျှင် တစ်ကြိမ် သက်တမ်းတိုးရသည်။

 ၂ဝ၁၉ ခုနှစ်သက်တမ်းတိုးကာလ ၌ ရေဆိုးသန့်စင်မှုစနစ်ထားရှိရန် ညွှန် ကြားထားပြီး ရေဆိုးသန့်စင်မှုစနစ်မရှိ သည့် စက်ရုံများကို လုပ်ကိုင်ခွင့်ရပ်ဆိုင်း သွားမည်ဖြစ်ကြောင်း  RFA သတင်းဌာနမှ ဖော်ပြခဲ့သည့် သတင်းအချက်အလက်အရ သိရသည်။

Leave a Reply

Close Menu